留在家


個人分享
Tagged With: , , , , , , , , ,

「措施」

其實個政府係唔係真係傻㗎?當然明白最近大家嘅防疫意識開始減低,但係出街唔可以多過四個人,食飯一抬又唔多過四個人,餐廳要每一台至少隔開一點五米。而措施係今晚六點鐘生效,咁今日結婚嘅新人點算?無啦啦話實施就實施,咁究竟邊個埋單先?如果一早封關,然後全部強制入隔離營,相信感染人數應該會少好多。當然有啲人會好自私咁唔理其他人,不過如果無乜嘢嘅話都真係留返係屋企好啲!

「疫情」

本來香港嘅疫情都唔算太差,甚至乎係都算叫做受控,雖然個垃圾政府點都唔肯封城但係好彩我哋香港人都已經習慣咗唔會靠佢哋。亦都因為經過沙士一役,大家嘅防疫措施做得好,最起碼個個都會戴口罩,唔會覺得隻肺炎兒戲!不過因為之前由海外返嚟嘅人實在太多,近日嘅感染個案日日都雙位數字。而今日起好多娛樂場所都要關閉十四日。真係唔單止將店舖嘅營運問題雪上加霜咁簡單。

「玩完」

講到尾究竟疫情幾時先至會完結,大家仲要捱幾耐?咁樣落去真係唔知頂到幾耐。就算香港捱過咗,但係世界各地仲未搞掂。今次嘅影響究竟會有幾多人失業?一般嘅公司營運都真係最多只有三至六個月嘅現金作儲備。再加上好多行業完全做唔到生意,基本上真係等執笠。所謂嘅補貼或者支援其實都唔係個個行業都涵蓋到,本來大家覺得第三季仲有機會可以有啲起色,不過而家咁樣,今個 2020 年睇落都真係玩完!