「影響」
今次嘅武漢肺炎係全球大暴發，初時以為只係影響亞洲地區，點知亞洲都未搞掂就已經散播到全世界。金融市場受到打擊當然不在話下，但係跟住落嚟嘅連鎖反應同影響有幾深遠就仲未知。最起碼首當其衝就係旅遊業，因為無人可以旅行亦都無人去公幹，個個宅係屋企。所以航空業，酒店業，甚至乎網上訂機票同酒店嘅平台都會受到牽連。最後仲有幾多公司可以捱得過疫情嘅影響都係未知之數！
「洗牌」
正因為今次嘅疫情令到好多人都開始諗究竟全球化嚟個模式仲係唔係未來嘅方向。當然自己嘅事業發展亦都全因為全球化嘅概念下而急劇成長。好多國家將低價值嘅產業輸出去一啲低成本嘅國家，通常都被稱為發展中嘅地區，咁就可以將自己國家嘅生產力慢慢推去高價值嘅產業。而因為依賴其他國家嘅生產力，當有重大事件出現嘅時候，好似疫症咁，就好容易打斷嚟個全球供應鏈，導致失效。
「策略」
相信好多公司，企業，國家都會重新諗下全球化嘅策略。最大嘅可能就係將某啲產業再一次本地化，就算成本會比較高，但係最起碼係自給自足。當然唔係所有產業都會係咁，最起碼對資訊科技同創新產業嘅影響會比較細。而且好似香港，新加坡咁，好多嘢都係要靠外地入口，根本上無條件自給自足。究竟疫情過後會係點無人知，只不過嚟個議題必定令好多行業再一次諗下未來嘅策略。
