第十五

「記錄」

係時候記錄下郭小姐嘅成長!雖然我哋每日都好忙,俾佢嘅時間相對比郭大少少,不過其實佢真係幾聰明。依家真係周圍爬,周圍走,知道自己要乜嘢,亦都開始表達自己想要乜。當然好多嘢同郭大少唔同,尤其係啲脾氣,真係唔講得笑。唔知以為佢好斯文,要發脾氣都真係搞佢唔掂,因為佢真係可以鍥而不捨。係都要你投降為止!都係嗰句,總會有個治得掂你嘅人嘅!

「十五」

當然係疫情之下好少出街,不過相比起之前有工人嘅時候,郭小姐基本上都要同我哋一齊。分別其實都真係幾大,最起碼依家無咁怕陌生人,成日想出街。依家仲自己走去鞋櫃到拎對鞋仔想自己著,真係服咗佢,完全睇得出佢大咗會係一個街精。當然無嘢安慰過佢係一個好食得嘅小朋友,依家成日想食我哋啲嘢,唔比佢真係會鬧鬼你。當然食得是福,只係有啲嘢佢真係未食得!

「趣事」

郭大小姐真係幾搞笑,而家行路叻咗就係屋企周圍走。因為郭大少鍾意睇書,好多時佢又會學佢拎住支點讀筆篤啲書。最好笑嘅係可以食食下嘢就瞓著咗!而郭大少細個從未試過,所以終於見識到啲小朋友真係可以食食下嘢瞓覺嘅情景!直到依家我都唔明點解佢可以食咁多嘢,份量真係同大人差唔多,最起碼一定多過郭大少。女仔或者係唔同啲,影相嘅時候識望鏡頭,仲要擺埋甫士,死未?