新思維

「數據」

好耐冇寫關於數據嘅嘢,係時候更新下大家嘅知識。相信好多人一講到網站分析就會自自然然諗起 Google Analytics。只不過如果你睇返佢嘅歷史其實已經係一個好舊嘅技術。要滿足現今嘅客戶行為分析,其實已經有啲過時。原因係依家嘅用戶行為變得複雜,而傳統網站數據分析嘅工具係好難好快咁了解客戶係唔同嘅接觸點嘅行為。Google Analytics 亦因此開始進入業界稱謂嘅第二代嘅改版。

「二代」

究竟 Google Analytics 2.0 係指啲乜?其實最大嘅分別就係將網站同手機程式結合,等企業可以無縫咁了解用戶係唔同嘅平台之間點樣游走。不過有一個關鍵位就係註冊用戶同非註冊用戶。如果係註冊用戶,咁就好容易透過佢哋嘅用戶號碼去將線下,手機同線上嘅行為連貫起嚟。而記錄嘅係每一個用戶同平台嘅互動而唔係傳統嘅訪問次數,瀏覽時間,睇過嘅訊息。因為嗰啲訊息係已經再無執行價值亦都好難好快咁提高銷售!

「事件」

我哋業界稱為事件追踪(Event Based Tracking)其實唔係啲乜嘢新嘅構念。其實係將商業目標事件化。而要有效咁計算同分析用戶行為首先要建立嘅係客户旅程圖(Customer ourney Map),咁就可以有效咁標籤每個用戶同企業之間嘅互動。概念就好似網店嘅購物流程咁,由購物籃,填寫客戶資料,付款方法到成功付款。每一步都係會影響銷售。只係我哋將嚟個概念延伸到整個客户旅程而已!