做直播

「變陣」

最近幾個星期都係研究網上課程同直播嘅方案。當然唔少得去睇下其他人點樣去做,再好好咁諗諗自己應該點做。不過首先要試下反應,所以希望下星期可以做一次關於數據分析嘅直播。凡事都有第一次,試下都無妨。至於有冇人睇到唔係重點,最主要係習慣下點樣可以安排課程同時間。如果有人有興趣嘅希望可以一齊交流下。當然係設備方面仲未去研究,不過試咗先啦!

「課程」

都係怪自己之前幾年無好好咁花時間係培訓課上面,依家唯有臨急抱佛腳去準備網上教學。一直希望先將平台整好,亦都因為係想專業啲嘅關係,希望真係用上堂嘅方式去提供教學。不過自從上年九月開始,其實真係比較難開辦課程,所以一直都有諗過係唔係改做網上教學會好啲。當然整個課程要重新編排,因為要將原本三個鐘嘅課程縮短至最多四十五分鐘。

「方向」

當然我會比較著重質素,唔希望啲課程變質。網上教學會有一個問題就係互動同專注力。雖然一般香港人上堂嘅互動相對比較少,就算有問題都係落咗堂先會問。至於專注力方面亦都會大大減低。如果係預先錄製嘅課程,要好專心咁坐定定係電腦面前其實真係好難。不過做得網上課程嘅話亦都無可能次次做直播,要取得一個平衡亦都唔係一件容易嘅事。