下一步

「改變」

相信好多人都無諗過今年會仲差過上年,而且仲未知道疫症幾時會完結。雖然上年有中美貿易戰,但係影響到唔係好大。然後到年中開始嘅反送中運動,影響雖然係有,但係未至於修復唔到。不過邊個會諗過突然爆一個武漢肺炎出嚟,搞到過年之後基本上好多嘢都無辦法進行。大家都忙緊變陣,重新計劃,大家都希望頂得幾耐得幾耐,見步行步。

「逆境」

下一步大家會做啲乜?當然坐係度乜都唔做,淨係希望個市會好返,其實真係同等死無分別。就算疫情有所紓緩,但係可唔可以回覆返幾年前咁,其實都真係一件好難嘅事。上年年底已經諗住過完年重新佈陣,事前都已經準備同安排咗好多嘢,但係依家就算傾緊嘅項目同工作都無辦法繼續。雖然唔係第一次打逆境,但係環境唔同咗,今次難度亦都比較大。唔死就已經贏咗!

「準備」

當然機會係俾有準備嘅人,變陣係在所難免,反正好多嘢都慢咗同訂咗,其實係一個好好嘅時間去改變同做一啲長期策略嘅規劃。過去二十年,大家都經歷過無數嘅逆境,由 2003年沙士, 2008年金融海嘯同近十年唔同嘅問題,所以大家都應該習慣逆境。依家只可以守得幾耐得幾耐,等到時機就已經可以隨時出擊。咁啱今年十年,係時候做個大改變。