肉桂卷

「肉桂」

講起肉桂卷,相信好多人都食過。不過好食嘅肉桂卷就唔係易搵。又要軟熟,仲要有一種濕濕地,嚥嚥靭靭嘅感覺真係好難整。最重要嘅就當然要有肉桂嘅味道同香氣,再加上一杯熱嘅咖啡真係好正。之前係 IKEA 買過佢哋啲急凍肉桂卷,然後返屋企自己焗,老實講真係幾好食!始終肉桂卷都係起源於瑞士,而郭太少好鍾意食,成日問我早餐有冇肉桂卷,幾時再去買!

「美國」

今日天陰陰又濕又笠,所以晏晝就去咗行街,因為之前知道美國超人氣肉桂卷專門店 Cinnabon 係香港開咗首間分店,所以今日就去奧海城試下。招牌嘅肉桂卷係新鮮製造,至於材料方面由肉桂粉,麵糰到糖霜都十分講究。雖然要排隊等,但係對於屋企兩位肉桂卷控,排下隊試吓無所謂啦。不過真係幾好味,而且睇得出正常嘅份量真係好美國,因為都幾大個!

「品牌」

香港人對於 Cinnabon 未必太過熟悉,佢哋主打係肉桂卷於 1985年係美國西雅圖開咗第一家店,之後推出新產品包括迷你肉桂卷同肉桂棒等等。原來佢哋已經有過千間嘅分店,真係勁!香港奧海城係外賣店,基本上提供正常同迷你版嘅肉桂卷,如果你問我就唔好諗,買個正常版,雖然睇落有啲大件不過食食下你就覺得無乜嘢。依家佢哋有經典原味,朱古力同焦糖核桃三款口味!