「公園」
藝術公園係西九文化區嘅綠色心臟地帶，因為冇乜限制，大家可以去野餐，帶寵物去玩，而小朋友可以踩單車。最吸引嘅係海傍無圍欄，非常之空曠，望住個維港飲杯咖啡睇日落都真係幾寫意。如果整個園區起好晒應該會更加舒服。希望之後疫情過咗之後唔會有太多內地遊客，始終太近高鐵站同個故宮博物館。如果唔係一個咁好嘅地方相信又會被糟蹋！
「西九」
相信好多人都已經悶咗好耐，都想出去透透氣。早幾個星期同兩個小朋友去西九藝術公園都無咁多人，今日再去真係可以用人多擠迫去形容。當然因為改建好之後真係幾靚，而且配套唔錯，因為有餐廳啦，廁所又相對乾淨，同環境好空曠，一家大細去真係唔錯。小朋友又可以放心咁玩同踩單車，如果係市區嚟講真係幾方便。不過今日真係好多人，下次都係平日先去放風，人少啲，舒服啲！
「小心」
雖然只係開放咗一部份嘅海濱，但係個西九海濱感覺真係差天共地。相信因為多咗人係網上面分享，啲人真係多到一個點。不過咁嘅時勢大家日日鬱係屋企，就算大人唔使透透氣，小朋友都要出去跑動吓。當然大家都想除低口罩呼吸下新鮮嘅空氣，不過而家就算去到空曠都咁多人，其實或多或少都有風險。感覺上大家好似鬆懈咗，但係唔好唔記得疫情仲未受控，都係小心啲好！
