再寫過


個人分享
Tagged With: , , , , , , , , ,

「修復」

原來不經不覺已經無寫嘢咁耐,係時候再開始寫返,兼且要慢慢補返之前無寫嘅嘢。其實一直有寫低啲標題,只係真係無精力每日去寫,慢慢人嘅惰性同懶惰又出時嚟。因為唔希望就咁丟空咗同浪費咗之前寫落嘅嘢,所以再一次重新開始。當然仍然會依舊咁,一日一篇,每日三百字,去記錄生活嘅點滴。人老了,記憶差了,心態變了,唔寫就真係好容易忘記。

「再寫」

其實真係有諗過放棄唔再寫,因為之前所有嘢都差啲因為伺服器唔小心,導致所有嘅圖片都無晒,唯一慶幸嘅就係之前寫落嘅嘢仲有背份。不過亦都需要好多心機將啲圖片逐一補返上去。當時知道無晒所有嘢真係好沮喪,因為寫咗好多嘢,真係好多心機同心血係入面。好彩嘅係有六七成嘅圖片仍然係我部舊電腦入面,所以未至於無辦法執返好個網站。而家應該仲差四百篇文要處理,同大約兩年嘅文章要寫返。

「後悔」

因為過去兩年實在太攰,每日都有唔同嘅嘢要處理,基本上真係無時間去再有時間去寫任何嘢,不過依家睇返真係應該繼續堅持。好多嘢都唔係太記得,所以要少少時間逐一去諗返發生咗啲乜嘢事。不過慶幸嘅係整理舊文嘅時候發現自己嘅諗法其實同依家冇乜嘢唔同,只係環境變咗好多。唯有唔好俾自己有遺憾,都係重新開始寫返,最起碼以前啲文仲係度,不過要諗下點樣可以更好保存佢。好驚再一次無晒所有嘢!