係窮呀

「係愛」

好多人返工只係為咗份工,因為返工係為咗生活。但係如果你問大部份嘅人你鍾唔鍾意份工,又或者愛唔愛你自己嘅工作,我相信大部份嘅答案係唔鐘意同唔愛。其實如果你唔愛自己嘅工作,日復日,年復年,老實講又點會做得好呢?因為工作嘅目的同出發點根本就唔係要做好件事,而最緊要嘅係無愛!愛一份工好難,愛一個專業更難!所以做嘢係要搵一樣自己愛嘅嘢去做先至會成功!

「係窮」

真係好鬼死衰,因為林海峰喺叱咤嗰段「係愛呀?定係責任?」搞到過去嚟一兩日不斷係個腦度重複再重複嚟句嘢。究竟有乜嘢動力驅使你工作呀?係愛呀?定係責任?而大部份人都應該認同「係窮呀」!當然世事無完美,又要有一份自己愛嘅工作,又同時間搵到錢,其實真係好難。好多人都會為五斗米而折腰,所以就算幾唔鍾意份工都好,都要頂硬上!

「責任」

有時好難分辨乜嘢係愛,乜嘢係責任。因為你愛所以就有責任,而你責任亦都係因為愛。所以如果你愛自己嘅工作,首先就要承擔應有嘅責任去做好佢。不過現今嘅社會,有責任嘅人越嚟越少。因為窮呀嘛!而人越大,責任就越多,所以好多時都係因為責任而工作而忘記其實歸根究底亦都係係原於愛。就算幾不負責任都好,講到尾最後都係因為要為自己負責任。


Also published on Medium.