年尾文


個人分享
Tagged With: , , , , , , , , ,

「回顧」

二零一八年又係一個高低起跌嘅一年,慶幸可以係年頭走出低谷。雖然路依然難行,但係最起碼可以輕鬆少少,有透氣嘅空間。不過到咗年尾一切又打回原形,壓力依然有增無減,只係希望每日安然度過。過去一年體力透支,就連寫嘢嘅意欲都大減。好多嘢想寫,好想繼續日日寫文,但係真係無咁嘅心機同心情。作為一年嘅終結,都希望記錄下一個忐忑不安嘅一年。

「一八」

每年都希望可以做多啲,做好啲。年頭真係有諗過放棄多年嘅堅持,有諗過點解咁辛苦自己,不如回歸平凡同隨波逐流嘅生活,好等自己有喘氣嘅空間。不過一諗到現實係無可能嘅時候,又再次咬緊牙關繼續堅持自己所做嘅嘢。今年最值得高興嘅就當然係年尾屋企多咗個新成員。人老了,希望明年會更好同可以專心做自己想做嘅嘢。最緊要嘅係健健康康睇住兩個仔女成長!

「情緒」

今年唔好嘅嘢真係數之不盡。舊年爺爺離開我哋之後,其實一直影響自己今年嘅心情。而相識多年嘅朋友亦係年頭離去,完全感受人生如何身不由己。兩件事都影響今年嘅情緒,而無諗過今年另一個重創就係嫲嫲嘅健康亦都出現問題。加上工作同屋企嘅問題,基本上體力同精力都已經完全透支,可以用崩潰去形容。所以真係無時間去靜靜地咁諗吓下一步應該點做。