「三歲」
眨下眼郭大少就已經三歲了，當然今日要同佢慶祝啦。一起身同佢去上音樂堂，之後就去咗啟德嘅一間親子餐廳玩，然後再飛入去迪士尼睇巡遊同玩咗陣，因為夜晚同屋企人食飯慶祝。依家啲小朋友真係幸福，不過都係希望佢有一個開心嘅生日啫！見到佢健健康康咁成長，每日燦爛嘅笑容，其實就已經好足夠。不過時間真係過得太快，由一個嬰兒搖身一變，變成一個小朋友！
「成長」
過去一年郭大少成長咗好多，當然希望佢繼續開開心心咁成長。有時真係俾佢激死，講啲嘢有時真係唔知好嬲定好笑！而家經常問我哋點解，但係真係解到頭都爆埋，因為有時真係唔知點解釋俾佢聽！不過係好事嚟嘅，因為證明佢求知慾強。再過多半年郭大少就榮升成為大哥哥，希望佢可以同妹妹一齊快樂咁樣成長。當然我哋唔會因為多咗個細妹而忽略你啦！因為你係我哋嘅心肝寶貝！郭大少生日快樂！
「期望」
每個小朋友都有佢嘅長處同短處，而踏入三歲嘅郭大少真係有啲難搞。有時真係好少嘅事就發脾氣，搞到我哋都不知所措。究竟係因為由茶煲二進入麻煩三定係因為你怕細妹出世我哋就忽略你，唔疼錫你呢？雖然有時真係唔想你大得咁快，但係有時真係激死我哋，雖然知道每一年你都會有新嘅難題俾我哋，不過最希望嘅都係可以見到你健健康康同繼續快快樂樂咁成長。加油啊大哥哥！
Also published on Medium.
