「阿蘇」
第四日嘅行程係起身食早餐，之後就去黑川嘅溫泉街行咗陣，然後就出發去阿蘇火山。第一站係去大觀峰，因為上次落大雨乜都睇唔到，所以今次再去過！而今次就睇到阿蘇五岳！之後我哋就揸車去到阿蘇，而我哋中間經過阿蘇駅，當然郭大少見到就話要入去車站，因為佢最鍾意嘅就係火車。我哋亦係旁邊嘅店舖買咗阿蘇出產嘅士多啤梨，真係又平又大又好食！食完一包之後忍唔住去買多包！
「火山」
真係無諗過原來想去睇阿蘇火山係一件咁難嘅事！上次就因為落大雨兼且好大霧，所以我哋無去到，但係今次雖然天朗氣清同落大雪，不過又因為火山活動嘅關係，去到火山腳都係無得上去睇！我諗我哋都真係同阿蘇火山無緣，亦都相信我哋下次去九州嘅時候唔會再去。因為每次去都係要睇彩數，唔係話你想去就去，所以真係唔想下次再去到先發現又係睇唔到火山。
「景色」
沿途揸車上阿蘇火山嘅時候，沿途嘅樹都鋪滿咗厚厚嘅雪，真係好靚！對上嗰次見到咁嘅景色真係係芬蘭！因為上唔到阿蘇火山，所以我哋就去返草千里，因為真係好靚！一大片原本係綠油油嘅草地變成一望無際嘅雪地，而且啲雪都算厚，最重要嘅就係無人。我哋同郭大少落咗去影相，因為真係好凍所以玩咗陣就走。雖然去唔成火山，不過最起碼沿途嘅景色好靚，相信亦都係好難得見到草千里鋪滿雪嘅景色。
Also published on Medium.
