「旅行」
對上嗰次一家人去旅行應該係去北海道，講緊都應該係上年七月嘅事。當然自從郭大少出咗世之後，我哋每次去旅行都要帶埋佢一齊去。每次同佢去旅行佢都好興奮，而今次亦都唔例外，今次佢自己多咗個私家喼，全程自己話要拎住佢唔肯俾我哋搞。睇住佢拎住隻喼仔真係好好笑，當然要多謝送隻喼俾佢做生日禮物嗰位兄弟。沿途係機場都真係吸引咗好多途人嘅目光！
「福岡」
新年前去旅行當然就只係得一個原因，就係上年搶到平機票，不過訂機票嘅時候忘記咗問個兄弟定咗邊日結婚，搞到撞咗期去唔到佢哋嘅婚禮。唔知點解每次去旅行之前都有好多嘢要忙，真係可以用得閒死唔得閒病嚟形容。好彩家有一寶，安排晒所有行程。今次係我哋第二次去九州，不過就同上次去嘅地方唔同，今次主要係福岡市同周邊嘅地方玩。終於可以出去透透氣！
「好凍」
好彩今次上機無幾耐郭大少就瞓咗，總算可以同我哋休息下。我哋到步嘅時候已經係傍晚時份，亦都無諗過今次嘅旅程係我哋去旅行咁多次最凍嘅一次。天氣預報係大部份時間都係得一兩度，仲要落雪。而今次係郭大少第一次去啲咁凍嘅地方，之前係迪士尼見啲假雪就見得多，真雪就應該會係第一次。唔知佢會有啲乜嘢反應呢？不過當然一落機就去行下同食飯，之後返酒店休息準備第二日嘅旅程！
Also published on Medium.
