「麻煩」
而家好多人都會怕麻煩，大部份嘅人都會諗多一事不如少一事。好多人都會講，理人咁多嘢做乜呀？顧掂你自己先啦！但係有時真係多一事不如少一事？或者就係你多事就會改變咗某啲事情。或者嗰一刻你會覺得算把啦，唔好理啦關自己咩嘢事，但係轉過頭你又諗理唔理好呢？當然無人可以迫你做多嗰少少，只係如果個個都自私自利嘅話，最終有機會影響返自己！
「多事」
如果你見到一啲唔啱嘅嘢，你會點做？例如你見到有人偷嘢，你會唔會去制止？如果你見到有人受傷，你會唔會打電話報警？其實好多人心入面都會有猶疑，不過有時唔係多唔多事嘅問題！因為如果會導致一啲更嚴重嘅事情發生，之後你先諗點解當初唔做多少少，如果做多少少或者可以改變個結果就已經太遲！其實到事情發生咗嘅之後會就已經太遲了。所以有時如果自己覺得件事係啱嘅話，多一事係真係好過少一事。
「要做」
好多人都會馬後炮話當初點點點，又或者事情發生咗之後先至話如果當初點點點。其實講咁多仲乜？講咁多都係無用，因為件事都已經已成定局！你怕麻煩，你怕多事，就係咁好多嘢無得返轉頭！有時就係做多個少少嘅分別。所以下次如果你覺得件事係啱嘅，真係唔好怕麻煩！仲有千祈唔好求任何回報，事關其實有啲嘢無回報都應該要做！好心有好報！
Also published on Medium.
