「域名」
搵到一個好嘅域名真係好難，但係如果慶幸搵到一個嘅話真係要好好咁留住佢。買一個域名其實好簡單，而且價錢可以好平，只不過要慢慢搵！當然有域名唔一定要起個網頁，只係你有權利去使用嗰個域名。而咁多年嚟我都好想攞返自己個名，但係無辦法，俾人攞咗就係攞咗，唯一嘅方法就係睇下佢哋會唔會唔記得俾錢續個域名。另一個方法就係用高價收購，一個好嘅域名真係越嚟越少！
「搜尋」
好多人會問點樣先至可以係搜尋器入面排名可以排得高啲，其實好多人都仲未明白搜尋器嘅運作。甚至乎有公司會幫襯一啲所謂可以推高排名嘅服務，只不過到最後係唔係真係可以做到佢哋所講嘅就真係唔知喇。不過經過咗咁多年嘅網絡生涯，域名係好緊要，因為真係會影響排名。老實講而家邊度會有人記住你個域名，所以如果你個域名有關鍵字嘅話，可被搜尋嘅機率係會高啲！
「排名」
其實而家買啲短嘅域名基本上係無可能嘅事，而另一邊廂基本上每個人每日都總會用搜尋器一次。如果你個域名係用關鍵字組成嘅話，其實你已經成功咗一半。因為搜尋器主要係靠關鍵字嚟搜尋，所以如果個域名有關建字嘅話，搜尋器會首先搵域名再睇內容。所以就算你個域名長啲都無所謂，最緊要係有關鍵字。所以我用咗好耐嘅時間去諗究竟公司叫乜嘢名好！
Also published on Medium.
