「生蠔」
好多人都鍾意食生蠔，而每個人嘅口味都唔同。有啲鍾意蠔味重啲，有啲鍾意海水味重啲，有啲鍾意大隻，有啲鍾意細隻，真係好睇個人喜好。有時食生蠔又好似飲酒咁，唔同嘅國家，唔同嘅產地，各有唔同嘅特色。不過自己始終都係鍾意澳洲嘅生蠔多啲，當然係香港食嘅話相比起係當地嘅魚市場食貴，所以每次返到去都一定食番夠本。
「開蠔」
食生蠔一定要夠新鮮，如果唔新鮮嘅話真係有一定風險。所以如果真係想買返屋企食嘅話，其實最好係自己係屋企開。其實開蠔唔難，一般人都會將開蠔刀插入蠔殼底部，再慢慢撬開取出蠔肉，而開蠔專家嘅方法就係首先將生蠔放棄手掌心，用手指輕輕按實蠔殼，然後再將開蠔刀插入中指按着嘅位置。當刀尖感覺到蠔肉後反覆左右移動，就可以輕鬆打開蠔殼。
「類別」
乜嘢時候食生蠔最好？一般都係出產地嘅冬天時間！而生蠔種類亦都唔少，一般都會以佢哋嘅形狀嚟區分。主要分為瘦長嘅石蠔同扁平嘅銅蠔兩大類。石蠔通常生長係岸邊或者石灘，而大部分係由人工養殖，肉質比較結實清爽，味道亦都相對濃郁鮮甜，海水味餘韻無窮。至於銅蠔就生長係深海，肉少但係重口味，充斥着海水，礦物同金屬嘅味道。
Also published on Medium.
