「負面」
早前睇到一位朋友分寫咗一篇文章，睇完之後有點當頭棒喝嘅感覺。我哋係嚟個城市，嚟個世代生存，每個人都好努力咁為生活而奔跑。當然世界會變，而好多時亦都因為大家成長嘅年代唔同，亦都經常以一副我食鹽多過你食米嘅態度，慢慢覺得一代不如一代。但係我哋曾幾何時亦都俾上一代給予同樣嘅批評？只係時代唔同咗，與其抱怨社會只會越嚟越差，但係點解又唔諗下點樣令佢變好呢？
「資訊」
而家資訊實在太過發達，信息嘅流通量真係好驚人。個個都係社交媒體或者唔同嘅即時通訊群組入面發佈或者得到唔同嘅信息，慢慢資訊越嚟越氾濫，甚至乎睇足一日都無辦法消化。因為嚟個原因好多時大家慢慢被週邊環境影響，尤其係當負面嘅訊息俾人關注嘅程度或者不必要嘅放大，引致訊息過份傾斜。雖然我哋無可能有能力改變嚟個社會，但係我哋有能力去改變自己。
「檢視」
當睇完嗰篇文章之後，我亦都睇番自己過去所寫嘅文章，睇下究竟自己會唔會係其中一個有份散播負能量嘅人。因為無時間去返去逐篇文章去分類，如果單憑目測嘅話，相信我寫嘅嘢會係一半一半。當然我自己亦都係希望透過寫嘢去抒發情緒，所以難免有一啲負能量嘅文章。而選擇寫啲乜，負唔負面，其實控制權係自己度。講到尾如果自己唔改變嘅話，慢慢就會影響自己。
Also published on Medium.
