「教育」
教育小朋友除咗學術方面之外，其實個人認為比學術更加重要嘅係德育。因為德育係要由細開始培養，而學術真係幾時都學得到。一個小朋友成長後點樣待人處事其實係書本入面係學唔到嘅。唔同嘅國家有唔同嘅標準，亦都因為小朋友大部份成長嘅時間係校園，所以要選擇一間好嘅德育其實係重要過一間只係專注學術嘅學校。就算讀書又幾叻都好，如果無好嘅品德其實就已經大打折扣。
「倒退」
或者而家真係年代唔同咗，好多時發覺香港嘅小朋友係德育方面好似有倒退嘅跡象。會唔會因為社會富裕咗？生活好咗？小朋友好多時都係萬千寵愛在一身而導致？又或者係唔係因為教育體制嘅問題？當然每個人嘅標準有唔同，但係有啲好簡單例如照顧長者，幫助有需要嘅人，以禮待人等等，彷彿以前我哋係學校所學嘅嘢而家好似重視少咗。如果唔由少開始培養，大咗真係好難再改變。
「品德」
當中自己覺得品德教育係非常重要。要培養品德唔係只係靠讀書就得，因為小朋友嘅成長同學習品德嘅地方係來自學校同家庭。而嚟個教育模式係希望建立小朋友嘅待人處事嘅價值，當中包括誠實，仁慈，寬厚，勇氣，自由，正義，平等，尊敬等等。一個文明嘅地方就越著重品德嘅培養，因為大家都知道要改變唔係一時三刻嘅事。好多嘢如果而家唔做，之後想改都難。
Also published on Medium.
