「接替」
人越大就越會諗，究竟邊個可以接替自己嘅工作崗位同多年辛苦建立嘅嘢。搵接班人唔係一件容易嘅事，因為好多時唔係淨係信任咁簡單。要接班其實需要有同樣嘅理念，就算做嘢方法唔同，但係唔緊要。一間公司，一個團隊，係要靠一個共同嘅信念同環境先至可以一直行落去。就好似一啲百年老店咁，佢哋嘅根係唔會變，變嘅都係因為市場嘅改變，年代嘅改變，但係核心價值係唔會變。
「適當」
其實唔係今日先至講話要搵接班人。一個人係同一個工作崗位太耐嘅時候，想突破某啲樽頸位係有啲難度。而最重要嘅就係希望自己可以退下火線，然後等自己可以有空間再做其他嘢。唔係話搵到接班人就可以乜都唔理，只係希望可以將自己建立嘅嘢可以繼續承傳落去。而當你搵到適合嘅接班人嘅時候，最難嘅就係學識點樣放手，而唔係干預。如果唔係乜嘢叫做接班人呢？
「人選」
雖然唔知幾時會出現嚟個接班人，但係一直都有係度留意有無適合嘅人選。因為人總會有離開自己崗位嘅時候，而家搵定真係差唔多，如果搵唔到最後其實都只會得一個結果。不過話雖如此，有無人肯接又係另一回事。你想搵人接啫，都要人哋肯至得㗎。所以真係唔係一件易嘅事，話晒唔係大公司，因為佢哋總有人可以去接替你嘅工作同崗位。唔通真係等個仔去接手咩，佢真係睬你都嘥氣。
Also published on Medium.
