「銷售」
銷售真係一門好深嘅學問，因為唔係簡單咁簽幾張單，做一兩單生意就得。好多時都真係要有不屈不撓嘅精神，因為有時真係要試好多次先至有回報。當然有時係會浪費時間同精神，所以要知道邊啲要投放資源係好緊要。當然有時亦都要知道客戶嘅需要，如果無辦法滿足客戶要求，其實應該坦白直說。如果唔係到最後搞出一個爛攤子，損失嘅係自己嘅信譽。
「手法」
銷售嘅手法真係有好多種，但係就唔可以無道德。呃呃騙騙嘅手法真係見唔少，承諾太多但係到最後無辦法達到客戶嘅要求亦都唔少。當然好多時都會遇到一啲無理嘅要求，如果真係做唔到嘅話，其實真係唔可以勉強，因為到最後只會辛苦嘅係自己嘅團隊。所以銷售除咗為咗生意之外，其實都要自己嘅團隊可以孭得起先至得。正所謂無咁大個頭唔好戴咁大頂帽！
「心理」
每間公司都有自己嘅長處同短處，如果真係做唔到嘅真係唔好逞強。有時係要拒絕客戶嘅要求，做唔到就係做唔到。當然拒絕客戶要求係需要有啲技巧，但係有時少不免會受氣。不過唔緊要，今日唔得唔代表聽日唔得。如果客戶係欣賞你嘅，就算今日未必有機會合作，或者之後有機會呢。有時真係好難講，真係好睇時機。做銷售要有一個好嘅心理質素係非常重要！
Also published on Medium.
