「敢做」
雖然而家係數碼年代，而廣告亦都分為傳統同數碼兩派。但係做廣告係需要創意，唔係樣樣嘢都只係求回報。我之前亦都講過，數據唔係萬能，而如果太過依賴數據去營運嘅話，基本上係無創意可言。廣告除咗要有創意之外，亦都需要膽量去做。當然有時有啲廣告會太過前衛，引起社會爭議！只不過創作就係咁，唔可以下下都為咗討好市場而做，有時真係要鼓起勇氣踏出一大步。
「成功」
一個品牌嘅成功，其實唔但止睇淨係睇佢嘅業績，有時仲要睇佢哋嘅價值觀。雖然好多嘢係可以做出嚟俾人睇，但係至少佢哋肯做。如果一個品牌敢去嘗試嘅話，其實就已經差好遠。就算有廣告公司肯做一啲大膽嘅創作，到最後品牌自己唔去嘗試嘅話都無用。而最近有一個傳統珠寶品牌竟然用咗一個大家都忽略咗嘅角度去推廣佢哋嘅婚嫁系列。除咗講夠膽做之外，真係唔知可以講乜！
「保守」
其實香港好多公司都好保守，好多都只係得個講字，唔敢去做！或者有時佢哋係等一隻白老鼠去做咗先，然後先至跟人哋做。只不過好多時如果唔係第一個做嘅話，其實就無咗優勢。就好似數碼營銷一樣，越早做，廣告價錢越平，而且亦越早知道用戶行為。最重要嘅係品牌已經收集到好多有用嘅數據，進行分析之後就可以更有效同更精準咁針對市場同客戶。只係好多公司好多嘢唔敢做啫！
Also published on Medium.
