「廉航」
近年好多人都會選擇搭廉航去旅行，原因當然就係價錢比起傳統航空公司平。如果係短途嘅話都仲可以，因為最主要嘅係無咗飛機餐同行李要俾行李費。當然佢哋賺錢嘅地方未必係機票本身，所以佢哋嘅收入一定係靠其他嘢。不過廉航真係可以長做？真係可以靠其他嘢賺錢去營運？其實有時無嘢擔心，最擔心嘅係飛機嘅安全，斷估佢哋都唔會買架新飛機返嚟掛！
「快運」
過去一個星期，香港快運取消咗多班嘅航機，而正值長假期，好多人本來開開心心咁去旅行，但係俾佢咁搞一搞真係乜心情都無晒。有時啲機票真係好平，好多時大家都因為佢哋推出平機票而一窩蜂咁去搶購。但係如果長期都有平機票，咁佢哋真係可以靠其他服務賺返？其實歸根究底都係因為管理差先至會導致有咁嘅問題出現。而家買佢哋嘅機票真係要再諗下先，唔係到時無得出發就大鑊！
「懲罰」
其實係外國，好多年前都已經有制度如果航班臨時取消嘅話，其實係有嚴厲嘅懲罰。只不過係香港依然仲未有相關嘅規定。今次嘅事件更揭發政府對航空公司嘅服務水平監管嚴重不足，過往太過依賴業界自律嘅監管模式。只不過係廉航時代之下，顯得極之落後。其實航空業真係有好多監管嘅漏洞，好多時消費者都無得到應得嘅保障。如果次次都只係賠錢了事，其實都唔係一個長遠嘅策略。
Also published on Medium.
