「傳統」
據聞係一八八零年嘅中秋節前夕，颱風吹襲大坑村，當時有一條大蟒蛇吞食村入面嘅家畜，之後村民合力將佢係破屋入面打死。到咗第二日颱風過後，大蟒蛇嘅屍體失蹤，大坑村發生瘟疫，多名村民病亡。當時有村中父老表示獲菩薩報夢，於中秋佳節舞火龍繞村遊行，同時燃燒炮竹，便可驅瘟疫矣。由於炮竹內含琉璜白藥，加上香火便可驅瘟疫。村民發現此古老良方奏效大喜，因此每年都會紮製火龍巡行全村。
「火龍」
火龍晚上大約六點鐘左右係大坑蓮花宮點睛開光，之後再到安庶庇街插香後起龍，先到浣紗街對嘉賓作致敬禮。然後會按傳統遊街，途徑浣紗街，京街，新村街，銅鑼灣道等。遊街完畢會到浣紗街拔香同重新插香。而節日完畢後，傳統習俗係將火龍拋下銅鑼灣避風塘嘅海底，以示龍歸天。但係近年為免污染海水，於是就改為係深夜用貨車送到焚化爐去，變做飛龍在天！
「製作」
火龍嘅製作係非常講究。龍身全長六十七米，分成三十二節。先以粗麻繩紮成龍骨，再用稻草紮成龍身。龍頭由藤條屈曲為骨架，龍牙以鋸齒嘅鐵片造成，雙眼係手電筒，舌頭係漆紅嘅木片。帶引舞龍嘅珠球係個插滿線香嘅沙田柚，一共兩個。舞龍時，全條龍身都插上火紅嘅長壽香，係夜間舞動，點點星火，十分可觀。舞龍健兒不論係唔係大坑居民均可參與。
Also published on Medium.
