「教書」
今年真係不斷教書，但係有時真係遇到一啲好奇怪嘅學生。有時心諗其實佢哋究竟點解返學？當然好多人都會選擇去繼續進修，而好多時都係要真金白銀咁俾錢去讀。既然俾咗錢咁點解又唔認真咁去讀呢？唔通真係諗住隨隨便便上完堂，考個試，然後就拎完張證書，等自己可以升職加薪？乜讀書唔係為咗增進知識？嘥咁多錢同時間，為嘅係啲乜嘢呢？如果係咁不如唔好讀啦！
「教學」
有時教書真係可以好唔開心，尤其係遇到一啲無心上堂嘅學生。而最奇怪嘅係有啲學校收生真係可以咁隨便！只要有人俾錢，好多嘢都可以唔理。當然我有嘅執著同底線，但係而家攪到啲學生好似啲客咁，就連學校都當佢哋係客咁，有時真係唔知可以講啲乜野好。當然明白如果比咗錢，而到最後學唔到嘢，感覺會好似俾人呃咁。但係如果係學生本身嘅問題，佢哋係唔係應該自己去承擔責任呢？
「問題」
自問未必係一/個最稱職嘅老師，但係我每次教書都係好用心咁去教，因為希望啲學生真係可以學到嘢。雖然去過唔同嘅地方教書，但係真係第一次遇到一啲奇怪嘅情況。最奇怪嘅係點解而家啲學校一收到投訴就咁驚呢？學生有問題原來係教師嘅問題？比咗錢唔通真係大晒？連一啲基本返學嘅要求都達唔到嘅話，真係憑啲乜嘢話個老師？所以有時都真係唔知啲人諗乜！
Also published on Medium.
