「膽大」
好多時做嘢係要膽大心細，做生意嘅更加要面皮厚。有時做決定係需要當機立斷，但係好多時都會驚做錯決定，不過如果唔做決定嘅話，或者會錯過咗某啲時機。所以決定咗就唔好諗返轉頭，因為通常你都會發覺自己忽略咗好多細節。不過經一事長一智，慢慢就會變得更加細心，去留意細節。話雖如此，好多時仍然粗心大意，真係要慢慢嚟，唔好急！
「心細」
近日有位朋友係網上面分享咗兩個遊戲，兩個睇落都好似好簡單，但係其實係需要顧及圖片入面嘅細節。所以好多人一開始都會答錯，但係再細心啲睇，自自然然就會注意到啲細節。好多時我哋係日常生活都會係咁，好容易就忽略咗好多嘅細節！而有時就係嚟啲唔起眼嘅細節影響結果！所以要成功有時真係要夠細心，唔好輕舉妄動，要睇清楚先至行事！如果唔係分分鐘得不償失！
「低估」
有時真係唔好睇少一啲好簡單嘅遊戲，因為開始嘅時候或者已經低估咗個問題，就算已經講明注意細節，好多時都會忽略咗。就好似有時有啲人會俾你一啲意見，但係開頭你不以為意，聽完就算，但係慢慢你會發現原來自己太過粗心大意。正所謂旁觀者清，如果太過自以為是嘅話，最後搞到自己損手爛腳就無謂啦！有時真係唔好太過高估自己，低估問題係一個致命傷！
Also published on Medium.
