「鄉郊」
去到富良野嘅最後一日，玩完之後就開始要回程返去札幌市。嚟幾日真係熱到傻咗同晒到燶咗！不過都係一件好事，因為如果陰天嘅話就好難影到靚相！希望將來有機會再嚟嚟個地方。如果你問我嘅話，我都真係比較鍾意去啲郊外地方。或者我唔係鍾意行街買嘢嘅人，所以去到啲鄉郊小鎮反而仲覺得舒服。如果退休之後可以係嚟啲咁靚，咁休閒嘅地方生活就好啦！
「回程」
今朝一早係民宿食完早餐就出發去咗上富良野日之出公園睇薰衣草。當然無富田農場咁大同咁多花，但係佢可以俾遊客走入去個花田入面影相。而郭大少亦都好興奮咁係花田入面跑嚟跑去！影完相之後我哋就去食嘢，誤打誤撞去咗間好似係米芝蓮嘅麵館，只不過就等咗我哋個幾鐘先至有得食。食完之後我哋就去咗食當地嘅哈蜜瓜加雪糕，然後就決定早啲返札幌。
「民宿」
本來一早訂好咗一間民宿，但係點知去到之後先至發現無冷氣，真係想死。無冷氣都唔緊要，但係只係得一把風扇。聯絡個屋主佢就叫我哋開窗同開風扇，只不過佢間屋係三樓，對住大馬路，對面係警察局同消防局，一開窗就超嘈！就算開咗窗同風扇都熱到傻咗！所以就立刻咁搵間酒店，聽日就即刻搬！如果天氣仍然咁熱嘅話都真係唔知點算，所以無計只可以搵間酒店解決無冷氣嘅問題。
Also published on Medium.
