「回歸」
香港政府真係無嘢搵嘢嚟做，人哋唔知以為香港發生咗啲乜嘢事。我相信習近平去過咁多個國家，應該無一個國家或者城市因為佢去探訪而要勞師動眾，又封路，又整啲巨型嘅水馬圍著佢。就算係嗰啲乜嘢國際性峰會都唔會好似香港咁！搞咁多嘢至可以話勞民傷財，超級擾民。其實香港回歸二十年，唔係應該俾全世界睇究竟香港係一國兩制下有啲乜嘢成個咩？咁搞法真係丟架！
「擾民」
香港回歸二十年，習近平今日到訪，出席一連串嘅活動！亦都因為咁，好多地方都要配合佢嘅行程而要封路。最慘嘅係好多人都係灣仔返工放工，與此同時亦都影響附近嘅交通。香港政府真係除咗做啲低能嘢去擾民之外，其實都唔知有啲乜嘢建樹！當然有國家級領袖到訪，加強保安係有必要，但係搞到咁真係俾人笑到搵窿捐。每次都淨係斬腳趾避沙蟲，咁不如唔好搞乜嘢慶祝活動咪得囉！
「平民」
其實回歸年年都有，過多三十年仲駛唔駛慶祝？香港到時都唔知仲係唔係叫做特別行政區！講真真係唔知有啲乜嘢好慶祝，樣樣嘢都係做出嚟，根本就反映唔到香港實質嘅情況。如果真係想了解香港，其實係唔係應該去睇下啲劏房？去啲平民百姓嘅地方去視察民情？感覺真係好似皇帝出巡咁，認真擾民！如果下次係啲其他國家嘅總統嚟香港嘅話，唔通又搞到咁樣樣？唉！
Also published on Medium.
