「數據」
其實好多時有啲客都會問我如果搵我做數據分析，可唔可以保證做完有成績睇！通常我都會話無可能，因為每間公司嘅環境唔同，客戶群唔同，策略唔同，產品同服務都唔同！所以我係無可能包生仔，我只可以話俾佢哋知我哋常見嘅問題，一般嘅處理方法，同過往做嘅分析嘅經驗。當然有啲客堅持要我哋保證有成果，不過我都係嗰句，無可能！因為數據都唔係萬能㗎！
「生仔」
我應該好似唔係第一次講，呢個世界真係有人會相信俾少少錢就可以包生仔。因為好多時都會係咖啡店到做嘢，我諗基本上十次有七八次都會聽到類似嘅對話。最多聽到嘅就係話叫你俾八千蚊一個月幫你落廣告，然後保證你公司嘅網站會係搜尋器第一頁到出現。聽完，心諗，香港唔通真係有人信？而事實係真有人信先至大鑊。最怕嘅就係遇到啲客同你講類似嘅嘢，真係唔知點答佢！
「專業」
有時真係想走埋去你啲人到問佢如果做假係唔係賠返錢比我。每個行業都有害群之馬，而就係嚟啲人搞到我哋個行業亂晒。所以有時點解會返轉頭教書，其實係希望撥亂反正！不過最緊要嘅係啲人要明白，嚟個世界邊度有咁大隻蛤乸隨街跳？如果真係幾千蚊可以搞掂嘅嘢，個個都搞咗啦，仲會等你咩？如果真係咁簡單咁就唔使搵我哋嚟啲專業人士啦！明嘅就會明，唔明點講都唔會明！
Also published on Medium.
