「團隊」
不經不覺離開咗大公司已經八年，正所謂人走茶涼！如果今日仲記得你嘅話，其實你應該感到安慰。當然我唔知仲有幾多人會仲記得我嚟個上司，或者係佢哋心目中都只不過係一個分配工作比佢哋嘅人而已。有時自己真係幾懷念當時嘅團隊，相信依家好難再建立返一個咁有嘅質素嘅團隊。我只可以話我幸運遇到每一位同我齊上齊落，完全信任我嘅團隊！無佢哋就無今日嘅我！
「成就」
做咗嘢咁多年，教咗書咁多年，其實最有成功感嘅唔係自己做到啲乜嘢成績，而係見到自己請返嚟嘅員工同自己嘅學生都有一個好嘅發展。或者係人生入面我只係一個過客，所以記唔記得我亦都唔重要，只要佢哋成功，其實就係我最大嘅成就！做人做事如果只係顧及自己嘅利益嘅話，就算你幾成功都好，其實都無用！你點樣對人，人哋點樣對你，好多嘢其實都係相向嘅！
「舊時」
或者真係人大咗，開口埋口都講舊時，而家終於明白啲老人家點解咁鍾意講啲陳年舊事。雖然真係事隔十年，但係大家真係好似坐咗時光機咁，返到去當年大家一齊工作嘅日子。雖然有時未必真係見到面，不過見到佢哋係社交媒體更新自己嘅近況，知道佢哋嘅發展，其實就好似啲父母見到自己啲仔女咁。希望有一日可以同你哋再一次並肩作戰！
Also published on Medium.
