「執著」
郭大少真係一個好有主見嘅小朋友，而家好多嘢都要自己嚟，自己揀，唔啱心水就發脾氣！當然可以話佢硬頸，死硬派，不過如果佢大個咗之後將嚟種執著用係適當嘅地方，相信好多嘢都應該難佢唔到。雖然每個小朋友都有佢難搞嘅一面，但係如果用另外一個角度睇嘅話或者係佢哋嘅優點，只係有時就算你想咁諗嘅時候，往往都會被佢激到你紮紮跳！
「記錄」
仲有兩個月郭大少就兩歲，再過多幾個月就開始返學，真係越嚟越唔捨得佢大得咁快。每個月去記錄佢嘅成長其實係為咗等自己唔好唔記得佢成長嘅點滴。不過最希望都係想同佢影多啲相，但係有時同佢出去真係無辦法顧及咁多嘢，而且要佢企定定望鏡頭真係無可能嘅事。所以而家好多時都淨係拎部電話影相多過部相機，真係要搵日認真咁同佢影返一輯沙龍！
「童年」
今個月同郭大少去咗睇馬術表演，去咗澳門睇熊貓，玩水，滑草，去海灘，繼續去迪士尼，去見偶像巧虎，去坐摩天輪，去玩具展，仲有去公園同玩滑板車。不過再過多幾個月就要返學，希望返學之前同佢去多啲地方，因為返學之後應該會少好多時間平日出去玩！小朋友嘅童年係應該去玩多啲，探索多啲，開心過每一天！希望你繼續開開心心，健健康康！
Also published on Medium.
