「勒索」
講到明係勒索病毒就當然係要俾錢之後先至會幫你解封部電腦，如果唔係分分鐘就會俾人刪除重要嘅資料同相片！以前嘅勒索病毒都係透過電郵散播，一個唔小心開咗嚟啲連結就不堪設想。當然好多人都未必知道郵件有問題，所以見到啲電郵都會點擊入面嘅連結。不過如果你真係不幸中咗招，其實真係唔好俾錢，因為俾得一次就有第二次，唔通次次都俾咩？
「病毒」
今次嘅勒索病毒真係會令好多人想喊！因為真係有好多人嘅作業系統都無定期更新。要真正知道嚟隻病毒對香港影響有幾嚴重嘅話，相信都要等到星期一大家返工之後先至會完完全全浮現。今次嘅攻擊係史無前例，因為影響嘅範圍非常之大！而最重要嘅係今次嘅攻擊係唔需要任何人打開任何連結都已經可以將電腦完全封鎖。所以定期更新作業系統係有必要嘅！
「攻擊」
勒索軟件肆虐全球近百個國家，針對使用微軟舊版微軟系統嘅電腦，就連英國公共醫療系統，俄羅斯內政部都被攻陷。香港電腦保安事故協調中心發出「極度危險」保安公告，可想而知嚟隻病毒有幾勁。因為只要你連接互聯網都有機會中招。好彩好多年前自己轉咗會用蘋果嘅電腦同作業系統，講真相比起微軟真係穩定好多同安全好多。不過無系統係完美，因為而家連蘋果嘅作業系統都多咗病毒！
Also published on Medium.
