「航拍」
依家好多人都有一部航拍機，因為入門嘅門檻越來越低，其本上好多人都可以買得起。但係啱啱入門嘅朋友好多時都唔係好識得點樣控制部航拍機，有時睇到佢哋玩都真係幾危險。當然航拍機可以拍攝到一啲唔同嘅角度，而自己亦都想玩。只不過一部咁重嘅物件如果撞到人嘅話都真係一件幾危險嘅事。雖然而家政府仲未係管得好嚴，但係如果繼續咁落去，我相信好快大家再無得咁自由自在玩航拍機！
「危險」
講真有時見到啲人玩航拍機都真係幾危險，我又唔知道你玩得叻唔叻，但係試過有個人係啲兒童遊樂場用嚟拍自己嘅小朋友！一來佢飛到好低，二來附近有好多小朋友係度玩。講真就算係拍自己嘅小朋友都應該注意下安全！而家有時聽到啲航拍機都會望一望，因為真係怕佢跌落嚟！最離譜嘅係有時揸緊車，竟然見到有航拍機係高速公路上面！如果真係跌咗落嚟，引起車禍嘅話，後果真係不堪設想！
「安全」
有時有啲人真係唔理其他人嘅安全。航拍機係好玩，但係點解連一啲普通常識都無？除咗機身本身有重量之外，其實嗰四隻或以上嘅螺旋槳都好危險，真係一個唔該飛埋嚟，你都咪話唔傷！所以依家見到人玩都會份外留神，因為邊個控制架航拍幾，有幾多經驗，真係無人知！所以真係需要有一個飛行限制，如果唔係到咗出事先至去管嘅話就或者真係太遲了！亦都希望大家玩還玩，真係為他人設想，唔好做啲危險動作！
Also published on Medium.
