「港產」
老實講真係好耐無睇港產片，最近最想睇嘅應該係「一念無明」。不過除此之外，今年被提名嘅電影真係有好多都聽都未聽過！或者近年真係睇少咗戲，所以真係無乜留意究竟有啲乜嘢嘅港產片。另外其實都有小小怕睇嗰啲合拍嘅電影，因為套戲有非本地嘅演員，啲對白好多時都要搵配音將佢變返做廣東話。其實感覺真係好怪，所以如果唔係啲超級好評嘅電影都好少會入場睇。
「電影」
又係一年一度嘅香港電影金像奬，但係而家真係好難先至有一套你想睇嘅港產片。當然好多人會話香港電影不如以前，而事實亦都擺在眼前，只不過其實香港係有好嘅電影，至於係唔係一定攞到獎唔係重點，而係套電影對於香港人嚟講係唔係一部好嘅電影。近年其實真係有好多有質素嘅港產片，只不過係需要啲時間重拾以前嘅光輝嘅年代！希望香港嘅電影可以再一次發光發亮！
「質素」
香港其實真係有好多人才，而咁多年嚟真係有好多好嘅電影。而家嘅香港人係講求套電影嘅質素，所以產量少唔緊要！當然係唔係攞獎嘅就一定好睇？其實又未必，因為每個人都有唔同嘅喜好，所以睇戲最更要自己睇得舒服。當然每年頒完獎之後，攞到獎嗰啲電影又會再一次掀起話題。但係點解要等到頒獎禮之後？講到尾都係羊群心理！攞咗獎就應該唔會差得去邊！
Also published on Medium.
