「夢醒」
有啲人話前幾日大家係度發緊夢，而今日大家終於瞓醒！當然人係需要發下夢，如果唔係又點會有機會改變？當然係點票嗰一刻真係希望薯片叔叔會成為我哋嘅特首，只不過心底裏亦都知道嚟個可能性極低。有時唔係淨係睇黨派咁簡單，就算明知係建制派又如何，最起碼佢真心為香港！所以一個人嘅品格係更加重要！如果你認為六八九嚟隻狐狸無品嘅話，咁柒柒柒嚟個奶媽會比隻狐狸更加無品。
「黑暗」
香港究竟仲要衰多幾多年先至夠？五年？十年？當然今日奇蹟並無發生，所有嘢都係意料之內，但係最起碼我哋有嘗試過！好多謝薯片叔叔幫我哋打咗一場漂亮嘅仗，而香港人知道七百七十七票係唔代表所有香港人。小圈子嘅選舉係唔會得到大家嘅認同，因為未來五年將會由一個俾梁振英更差嘅人做特首！真係唔敢相信香港會變成點？一個無民望，無品格，無信用嘅人做特首，真係灰到爆！
「得票」
今日睇住點票嘅時候見到奶媽得到七百七十六票，嗰陣時仲未計問題票就已經話，不如俾多一票佢做「柒柒柒」啦！點知真係開口中，奶媽真係攞到七百七十七票。「七七七」係神嘅數字，因為「七」係完美嘅數字，但係對於我哋嚟講，「七」同「柒」都係一個數字，只不過「柒」係大寫亦都係一個形容詞！而用嚟形容奶媽傻頭傻腦，外表形象過時同笨拙，真係好貼切。當然「柒」亦都可以形容思想落後，唔靈活！用嚟形容奶媽「離地」真係無更好嘅形容詞！
Also published on Medium.
