「夫妻」
三年前嘅今日，我哋由兩個陌生人變成夫妻。眨下眼又一年，而過去一年大家嘅重心都放咗係郭大少嘅身上，二人世界嘅時間變得越來越小。當然無諗過一個小朋友會帶嚟嘅改變係咁大！莫講話可以安安靜靜咁坐低食餐飯，就連可以傾計嘅時間都好少，事關忙完一日大家都已經筋疲力竭。所以而家可以兩個人一齊去享受下都真係一件幾難能可貴嘅事。
「皮婚」
今日係我同老婆嘅「皮婚」紀念日，雖然無特別嘅安排，只係簡簡單單去咗食一餐飯，但係對我嚟講就已經足夠，因為好難得先至有我哋自己嘅私人空間。本來一心諗住食好少少，點知揀咗間一般般嘅餐廳，真係失策！下次真係一定要搵間好食嘅餐廳再同老婆去過。二人世界嘅時間過得特別快，食完飯又係時間返回現實世界，就係返屋企照顧郭大少。
「婚姻」
其實我間唔中都會拎返結婚嗰陣時啲相同片出嚟睇，因為有時睇返真係幾好心。好多當日發生嘅情景，其實仲好似係無幾耐之前嘅事。係茫茫人海入面要搵到自己另一半係一件好難嘅事，所以慶幸嘅係自己搵到一個終身嘅伴侶。當然婚姻唔係一張紙咁簡單，而係一個一世嘅承諾。有時條路係有啲難行，不過只要大家一齊行嘅話，就算幾難行都一定可以行過去！
Also published on Medium.
