「潮語」
前幾日係唔同嘅平台都有講香港嘅潮語，真係唔睇由自可，一睇又有一啲新嘅潮語。有啲都仲知道係啲乜，但係亦有啲真係完全唔知背後嘅意思。當然潮語嚟樣嘢係好容易暴露自己嘅年紀，因為你一開口講嘢，或多或少都會夾雜咗當年最流行嘅潮語係入面。有時就算想扮年輕都無用，因為唔同年代有唔同嘅潮語，所以當你用某啲潮語嘅時候，其實就已經出賣咗你自己嘅年齡。
「年代」
香港係一個好特別嘅地方，每個年代都有自己嘅一套潮語，如果你發現自己開始聽唔明嘅話，咁就代表你已經開始慢慢唔屬於嗰個年代。好多時啲潮語都只係興得嗰一年半載，但係亦都有啲係咁多年嚟都通用。潮語其實係點嚟？好多時都係因為某啲事情發生咗而演變出嚟，通常都係由年輕人嘅圈子慢慢開始通用，所以亦都係因為咁嘅原因，好多成年人都會唔知道某啲潮語背後嘅意思。
「代表」
唔知大家認識幾多潮語呢？又有啲乜嘢潮語你覺得有代表性？潮語其實分開有粗口同無粗口，而有啲潮語其實係所有年代都適用。原因基本上因為實在無其他新嘅潮語可以取代原本嘅意思，同時亦都係社會廣泛流通，所以有啲潮語基本上再唔潮，只係變咗大家一啲常用嘅溝通詞彙。當然每個人都會長大，所以唔知啲潮語嘅意思係好正常，所以無需介懷，因為大家都曾經後生過，潮過！
Also published on Medium.
