「瑣碎」
當你嘅責任越大，你要處理嘅事就會越多。好多時亦都因為咁而令到自己原本做得最好嘅嘢都會做得唔好。所以要專注做好一件事其實好難，尤其係當自己營運一間公司嘅時候，因為身邊總會有好多瑣碎嘅嘢要你處理。所以如果可以放手俾人做嘅就應該放手，唔好等啲嘢積晒係自己身上，事關太多嘢嘅話到最後會被砸死！但係如果冇人幫嘅時候，真係要諗下邊樣嘢值得做，邊樣野係負累，就算壯士斷臂都要揀其一！
「馬騮」
人本身係貪心嘅動物，好多時都希望得一想二。當然人生有好多嘢想做，只不過每個人每日都只係得二十四小時，因此我哋要係唔同嘅層面作出唔同嘅取捨。每個人衡量一件事嘅重要性嘅方法都有唔同，因為大家心入面都有把尺。而如果都將所有嘢攬晒上身嘅話，就好似我以前老闆所講，每一樣嘢就好似馬騮仔咁箍實你。你攬佢上身好容易，但係要揈甩佢就好難。
「比喻」
以前老闆所講嘅嘢，每一樣都好記得，尤其係馬騮仔嚟個，因為實在太過貼切！因為曾經何時自己攬得太多嘢上身，點知所有嘢做係做咗，但係老闆一睇就知道我可以做得更好，所以有日佢就同我講馬騮仔嚟個比喻。一個人同一時間可以俾幾多隻馬騮仔攬住？佢話一兩隻你仲可以行得走得，四隻以上基本上每一步都會行得好慢，再多啲基本上你行都行唔到。到時要甩身基本上無可能，就正如工作一樣，應承咗做嘅話，一係就唔做，一係就專心做，做到最好為止！
Also published on Medium.
