「食嘢」
之前郭大少一直都坐唔定食嘢，但係今個月有明顯嘅進步，最起碼佢鍾意食嘅嘢都會自己主動攞嚟食。依家晏晝大部份時間都可以自己坐定定咁食晒大部份嘅嘢先至會扭落地，而且食嘢明顯食多咗，所以體重亦都重咗好多。有時單手抱佢真係唔抱得耐！最好笑嘅係佢睇落唔係好肥，但係佢有個大肚腩真係好搞笑。又唔怪得佢，因為有時佢真係食好多嘢，分分鐘仲多過我！
「返學」
再過多半年左右郭大少就要開始返學，而今個月有好多唔同嘅面試。當然我哋希望佢去到一間我哋鍾意嘅學校，但係有時真係好難講，要配合天時地利人和先至得。有時真係估唔到面試當日會發生啲乜嘢嘅情況，同時一個咁細嘅小朋友講真可以要求佢幾多。況且幾千人報名，有啲學校收得嗰幾十人，真係痴線！講到尾最緊要佢開心就得，因為而家香港嘅小朋友壓力真係大！
「成長」
今個月識講嘅嘢多咗，但係應該未到語言爆發期，不過相信佢會係一個口水佬。佢好鍾意巴士，每次見到都會講「巴巴」無咗個「士」字！見到救護車同消防車都好興奮！唔知係唔係因為有啲迪士尼嘅教材，所以佢好鍾意米奇老鼠，最興奮嘅就係係見到米妮！每次見到都指住係咁話「米妮」！男仔始終係男仔，好鍾意車同波，去到公園就好鍾意瀡滑梯。小朋友真係大得太快，真係開始有啲唔捨得！
Also published on Medium.
