「價值」
每個人嘅價值觀都好唔同，而往往好多人都將自己嘅觀點與角度擺咗落去自己嘅下一代。當然好多嘢我哋都希望可以薪火相傳，只不過時代會變，而我哋亦都應該要變。雖然有時係唔明白年輕人嘅諗法，但係佢哋係社會下一代嘅主人翁，所以有時無必要倒模式咁將我哋認為啱與唔啱嘅嘢灌輸俾佢哋。保護下一代係我哋嘅責任，但係過份保護，過份規管，就好大機會有反彈嘅情況。
「倒模」
香港係一個倒模式嘅社會，基本上絕大部份嘅小朋友由一出世開始就已經被家長，被社會倒模。不過每一個年代都有唔同，所以倒模出嚟嘅小朋友係會按照當時嘅社會環境而有所唔同。好多時聽到朋友慨嘆，但係問題其實在於社會，在於父母，在於教育。最荒謬嘅係當上一代被挑戰嘅時候，往往我哋唔係去理解問題嘅源頭，而係不斷去用唔同嘅方法去堵塞問題。
「問題」
雖然時代會變，但係如果唔與時並進，到頭來只會不斷倒退，嚟個正正係香港過去嘅問題。我哋不斷希望我哋嘅下一代嚟樣嗰樣，但係路應該係由佢哋自己揀嘅。只要唔係一啲作奸犯科，姦淫擄掠嘅嘢，咁咪得囉。當然每個父母都關心自己嘅仔女，希望佢哋開開心心，唔好咁辛苦。因此大家不知不覺間就將自己人生嘅一套完完整整咁灌輸咗落去自己嘅仔女度。
Also published on Medium.
