「提名」
相信好多人都好關心究竟曾俊華同胡國興夠唔夠提名票入閘參選特首。三月一日就係特首選舉提名期嘅最後一日，因此係嗰日之前要得到一百五十名選委提名先至有機會去參選。當然林鄭月娥得到一大班建制派支持所以好早就已經得到所需要嘅提名票。當然提唔提名係選委嘅選擇，所以提名期只係一部份人將會投票嘅意向。而如果按照目前嘅提名，應該已經超過六百個選委已經表態。當然最終都要到選舉當日先至知道最終嘅結果。
「入閘」
今日一早就見到新聞話薯片叔叔得到一百六十名選委提名，已經達到參選人必須須取得一百五十名或以上嘅選委支持，有資格正式成為特首候選人。而相信好多人都估唔到大部份嘅提名都係來自非建制派嘅選委。究竟佢有無辦法可以成為我哋下一任嘅特首？如果佢做特首又會點？當然依家佢嘅民望係最高，但係亦有好多陰謀論。不過如果你問我嚟刻如果要揀嘅話都應該會係薯片叔叔！
「特首」
當然係我哋無得揀嘅情況下，真係希望薯片叔叔可以當選。因為好明顯奶媽只會延續今屆政府嘅管治方針，社會嘅撕裂將會更大。雖然話中央政府唔支持薯片叔叔，但係如果到最後要睇民意嘅話，薯片叔叔其實係有機會同奶媽一決高下！不過點都好，最起碼今晚連胡國興都入埋閘，雖然應該係陪跑多，但係至少俾多一個選擇啲選委都係一件好事嚟嘅！薯片叔叔繼續加油啦！希望你可以做到特首，而且係一個好特首啦！
Also published on Medium.
