「好攰」
忙完一整個星期，咁就過完個新年。今年真係忙到傻咗，但係好開心因為第一整咁多糕送俾朋友。每晚夜麻麻做晒所有嘢，等郭大少同老婆瞓咗之後先至整。真係唔數唔知自己整咗十八底糕，而大部份都係好多人食完都話好食嘅黃金奶黃年糕。而今年最特別嘅就係自己第一次整蘿蔔糕同芋頭糕！雖然仲有好多地方要改進不過真係幾滿足，事關自己整嘅真係唔同啲！
「新年」
今日全家都散晒，好少可郭大少起身食完奶無幾耐又瞓過。所以今日等一家起身之後就淨係去咗飲茶同科學館玩咗陣然後買少少嘢返屋企煮飯食。今年真係由年廿九一直忙到年初三，因為之前要整定晒送禮嘅年糕，然後年三十晚就去食團年飯，之後年初一就四圍去拜年，初二係屋企整雞煲打邊爐諗住睇煙花，初三招呼咗啲朋友仔上嚟玩同食飯。而快樂嘅時光真係過得好快，今年真係要加倍努力工作！
「假期」
雖然今日係農曆新年假期嘅最後一日，但係好多人都已經開晒工。不過相信大家就算聽日要返工都應該仲係假日模式，只不過有一樣嘢好多人都會做就係返工逗利是同食開年飯。所以其實話就話返工，但係相信至少去到下個星期大家先至會回復正常。如果要等到下一個長假期嘅話，相信就應該要等到四月嘅復活節假期啦。不過點都好啦，希望今年事事順景，唔好有咁多阻滯！
Also published on Medium.
