「夜市」
每年一到農曆新年就會有好多唔同嘅夜市，而每年其實都係得農曆新年嚟段時間先至有街邊檔出現。嚟個其實係香港嘅特色，因為以前細細個香港係有好多街邊檔，只不過而家基本上好難有機會見到街邊檔。雖然而家無咗以前個啲路邊檔，不過一到新年其實好多人都好期待去掃街。但係啲嘢好唔好食就見仁見智，而事實上好多都一般般，只係大家都想趁下熱鬧，感受下傳統嘅香港特色。
「和諧」
自從上年初一發生衝突事件，今年嘅氣氛相對好好多。只不過桂林夜市風光不再，周圍都有警察駐守。不過係旺角朗豪坊就唔同晒，成條街都逼滿人，啲小販檔基本上佔據咗成條街。其實每年新年都有唔同大小規模嘅夜市，而啲嘢食都基本上都同以往一樣差唔多。好多小販都只係想趁新年搵多少少錢，而其實大家都開心，社會又少啲衝突，講真上年搞到衝突真係有啲無謂。真係官逼民反，就係咁解！
「掃街」
而家有咗郭大少真係好難帶埋佢去掃街，因為人又多，而且其實都幾危險，因為。有時好食嗰啲又要排隊排好耐，分分鐘要成個鐘。但係大家都好樂意去排隊，唔知大家係唔係有一種排隊癮。好多時貴就預咗，但係要大排長龍就真係唔好搞我，就算好食都係咁話！唔知大家會唔會去掃街？如果係嘅話真大家會食啲乜嘢多呢？自己就反而對傳統嘢有興趣，尤其係臭豆腐同碗仔翅！只不過要搵好食嗰啲就真係大排長龍！
Also published on Medium.
