「雞年」
今年嘅雞年好特別，點解？因為係今年係雙春兼潤月。即係點解？因為今年嘅農曆正月初七同埋十二月十九日都係立春節氣。雙春嘅意思就係指一年有兩個「立春」節氣。而今年亦都有兩個農曆六月，一個係正六月，一個係閏六月，一正一潤，所以就叫做潤六月。咁雙春加埋閏六月，所以咪叫雙春兼閏月囉。今年應該會有好多人會結婚，因為好年嘛！不過依家訂酒席嘅話就或者有啲難因為通常好年都一早俾人訂晒！
「拜年」
恭喜發財！係度先同大家拜個年！祝大家「雞」年行大運，身體健康，財源廣進！今年係第二年同郭大少出去拜年，一如以往去完爺爺嫲嫲屋企之後就去親戚屋企，去完返屋企影張全家幅之後就去老婆屋企食開年飯！今年郭大少識行識走，去到邊就走到邊。因為嚟幾日都好勞碌，佢基本上都係車入面瞓，返到屋企可以話斷咗片。莫講話小朋友，其實大人都好攰。。。
「節目」
不過唔知點解每年嘅年初一都好似會天陰陰，落毛毛雨，但係今年就比起上年嘅新年暖得多。每年新年其實都好想去掃街同睇戲，不過而家有時朋友就真係難啲。而今年應該都會係屋企多，因為跟住兩日都係自己屋企食。好彩依家就算新年啲舖頭都會開，所以可以聽日先至買餸煮嘢。唔知大家新年又會有啲乜嘢節目呢？不多最緊要都係一家人齊齊整整咁就得！
Also published on Medium.
