「尊重」
每個人都會將唔同嘅人同事分開唔同嘅次序同優先權，有啲人會以自己嘅利益行先，有啲就會話係家庭，又或者朋友，又或者工作。其實無論你嘅次序係點都好，每個人都會有少少唔同。有啲人會企係自己嘅角度去批評其他人嘅先後次序，不過其實乜嘢行先，乜嘢行後都唔係重點，而係你尊唔尊重其他人。事關每個人都有自己嘅權利去決定邊樣嘢優先！試問下如果你被人質疑嘅話你會點？
「優先」
其實人大咗，慢慢自己會將唔同嘅事物重新編排佢哋嘅優先權！以前我好肯定將工作排係所有嘢前面，因為工作帶俾我嘅係成功感。不過近年好明顯係將家庭放喺第一位，因為無嘢係俾屋企更加緊要。不過有時係好難去平衡所有嘢，因為有時某啲情況真係無得你揀，就算你幾想堅守都好，有時都要妥協。妥協唔代表要改變自己，只係喺某啲情況要作出適當嘅調整。太過堅持有時未必係一件好事！
「改變」
人生就係咁得意，當你一日一日長大經過某啲人生階段嘅時候，自自然然你就會作出調整，有時連你自己都未必察覺到。而最慘嘅係身邊嘅人改變咗，不過佢哋自己察覺唔到。因為佢哋會以新嘅優先權去處事嘅時候，所以就覺得同你有啲出入，一不小心摩擦就會出現。所以每當人生經歷重大改變嘅時候，自己其實應該檢視下自己有無改變先，當然知道有時真係好難，如果唔係當某啲事去到無可挽救嘅地步就大件事了。
Also published on Medium.
