「空間」
每個小朋友都會鐘意去遊樂場玩，因為可以周圍跑。係香港屋企地方細，可以走動嘅空間亦都唔多，每逢假日家長都會帶小朋友出去玩過夠。其實而家嘅小朋友同我哋嘅年代好唔同。以前我哋會見到一到晏晝啲小朋友放學之後，屋企樓下嘅公園同空地都會有好多小朋友跑嚟跑去。但係今時今日就真係好難見到咁嘅現象。或者真係時代唔同咗，又或者因為而家啲小朋友平日要去唔同嘅興趣班所以少咗係公園玩。
「放電」
基本上每逢週末，好多人都會帶小朋友去放電。而家啲小朋友真係好似勁量電芯咁，精力無限。係因為平時無咗我哋以前嘅玩樂時間，定係因為而家啲家長擔心小朋友自己去玩會搞到損手爛腳？不過而家有啲遊樂場真係好鬼靚，啲設施靚到自己都想玩。今日同郭大少去咗坪石遊樂場，地點真係有啲隔涉，不過就比較識合佢個年紀玩。有啲設施真係第一次係香港見，真係估佢唔到。
「設施」
一般嘅遊樂場大部份都有鞦韆架，瀡滑梯等設施。但係坪石遊樂場有個大型瑤瑤船可以坐六至八個小朋友同一座有升降機嘅城堡，你都咪話唔誇張。真係大有大玩，細有細玩。而家嘅小朋友嘅設施都真係同我哋以前嘅好唔同，真係乜都有。不過有時都真係幾擔心啲大個少少嘅小朋友，佢哋真係會橫衝直撞，好似癲咗咁跑嚟跑去，最驚就當然係佢哋會撞到啲細。或者以前我哋細個都係咁，只不過唔知係唔係因為而家係人哋父母，所以真係驚自己個仔俾人整到。
Also published on Medium.
