「今年」
今年見到好多人回顧二零一六年都話今年好多嘢都唔係太好。當然我都有同感，因為生活同工作嘅各方面都唔係太如意。點都好，今日係今年嘅最後一日，所以都係要為今年作一個總結。今年年頭搬咗屋，一家人換咗一個新環境，每日大家嘅焦點都係郭大少。今年同郭大少去咗三次旅行，分別去咗沖繩，蘇梅，同九州。而今年大部份嘅時間其實都係放咗係佢度，因為希望可以同佢一齊成長！
「回顧」
又係時候回顧今年，而我只可以話我好耐無試過遇到咁差嘅一年，雖然時間過得好快但係今年嘅落差實在太大。年頭仲唔錯，諗住今年可以有空間去做啲突破，點知一到年中情況竟然每況越下。今年無進步之餘，仲倒退到一個位自己都有啲驚。話就話無計劃無目標嘅一年，但係當然自己係有一定嘅期望。今年終於要完結，希望新嘅一年有一個新嘅開始，將所有唔開心唔順利嘅嘢都忘記佢，重新開始！
「期望」
講真今年真係唔知做過啲乜嘢，淨係知道一直忙屋企，忙工作。好無進步之餘可以話直頭倒退，因為好耐無試過唔知自己做緊啲乜，一啲方向都無。不過依家總算重新制定目標，希望明年會好返少少。我其實一直都唔係嗰啲大貪嘅人，我只係希望可以安居樂業咁就夠，最緊要就係可以有多啲時間陪郭大少同可以有一個更好嘅生活環境俾老婆。不過最緊要嘅都係一家人可以開開心心咁過每一日！
Also published on Medium.
