「熊本」
其實真係冇諗過熊本係咁多人，感覺有少少似去咗東京。而當揸車經過熊本城嘅時候，見到地震帶來嘅破壞，真係損毀得非常嚴重。不過琴晚入熊本市真係塞車塞到傻，因為原來今日係天皇誕生日嘅公眾假期，所以應該有好多人因為有個長週末就去熊本放假。希望下次再嚟九州嘅時候再去熊本行多次，因為真係浪費咗好多時間係路上。好彩今日返去鹿兒島嘅時候真係路路暢通，如果唔係真係想殺人！
「回程」
去到旅程嘅第五日，我哋終於返到嚟鹿兒島。今日係熊本食完個早餐就直接返去鹿兒島，因為路程都比較遠大約要二百公里，需要大約兩個半鐘頭嘅車程。當我哋返到去鹿兒島嘅時候已經係下晝兩點，所以就直接去食晏。嚟咗日本咁多日都無食過壽司，今日終於食盡佢！之後就連人帶車坐船去咗櫻島，而今次都真係第一次坐啲連車都上得嘅船。之後去完就返咗市中心行咗一陣街先至走去食鹿兒島黑毛豬。
「櫻島」
今日大部份嘅時間都無落雨，淨係由熊本返鹿兒島嘅時候一直落，不過真係好好彩一返到鹿兒島就停雨。一心諗住去櫻島影相同睇下火山，不過就真係好鬼凍，而且想落雨，所以去到湯之平展望所之後就好快走咗。之後就去咗個公園入面有個公眾足浴，然後就坐船返鹿兒島行街，行咗陣就去咗間叫「吾愛人」嘅黑豚專門店去食日式火鍋。我真係無食過咁好味嘅豬肉，就算有時係香港都會買鹿兒島豬肉食，但係就真係好唔同。去鹿兒島真係一定要食！
Also published on Medium.
