「別府」
經過琴晚嘅三個小時路程，同經過無數個隧道之後，終於我哋都係要七點幾先至嚟到別府。當然我哋超級唔好意思，因為人哋八點鐘個晚餐時間就應該完，點知比我哋搞到八點半。而食懷石料理係應該慢慢食，但係一來郭大少唔知點解成個旅程都超興奮，係度跑嚟跑去。所以到最後，我哋一窩蜂咁食完飯之後就返房換衫，然後去酒店個露天溫泉浸一浸。瞓完覺之後，今日嘅行程就係去睇別府嘅溫泉同去野生動物園。
「行程」
嚟到第三日嘅行程，我哋食完早餐浸多次溫泉之後，就出發去到別府最出名嘅別府八地獄，但係去到先至知道其中一個無得去。不過我哋今日都淨係去咗鬼山地獄，白池地獄，灶地獄，鬼石坊主地獄，海地獄，因為去完都已經肚餓要去食晏。至於血地獄同龍卷地獄希望仲有時間去啦。之後我哋去咗食胡月冷麺先至再出發去野生動物園。本來諗住郭大少會見到啲真嘅野生動物會驚，但係出乎意料佢竟然全程無扭計仲好開心。
「動物」
其實無諗過係日本會見到咁多嘅野生動物，又老虎，又獅子，仲有鹿，斑馬，大笨象，長頸鹿，犀牛，豹，駱駝，等等。話晒好多都係住係啲熱帶地方，但係竟然係啲咁凍嘅地方都有。雖然價錢真係有啲貴，但係至少可以俾郭大少去睇都啲真嘅動物就無所謂啦！其實我哋睇完動物就已經四點幾，所以就直接去今晚嘅溫泉酒店休息下。老婆今晚訂咗四季庵，而最特別嘅係佢嘅主樓係由世界遺產白川鄉搬遷過嚟嘅合掌式嘅房屋。
Also published on Medium.
