「行程」
今日本來打算一早起身，然後食啲嘢然後就出發去鵜戶神宮社，睇復活島石像同惡魔的搓板。不過我哋就遲咗起身，所以今日行程有啲趕，事關要夜晚去到別府嘅溫泉酒店。係宮崎市揸車去別府市要三個鐘頭，而因為溫泉酒店係有包夜晚嘅懷石料理，所以要六點半之前去到。雖然今日到最後因為復活島石像唔知點解無開，而我哋對惡魔的搓板亦都無乜興趣，所以最後返咗宮崎市食之前老婆訂好位嘅宮崎牛之後先至出發去別府。
「神社」
今日嘅第一站係鵜戶神宮社，而因為佢係一個海邊嘅石洞入面興建，所以好特別。而係鵜戶神宮社出面有一舊好出名嘅岩石叫做龜岩，係用嚟俾人許願。要許願就當然唔係隨隨便便啦，係要去買佢哋用陶瓷做嘅幸運石先至得。最難嘅地方唔係要擲入龜背上面個凹位，而係男人要用左手擲先至難！因為大部份嘅人係用右手，所以真係有啲難度。好彩幾次之後都有一粒幸運石中咗！我相信嚟個係今日行程嘅重點之一。
「和牛」
不過重中之重相信係今日去食晏晝個餐宮崎牛，因為宮崎牛係非常出名，而今日去嗰間餐廳亦都係一間好出名食宮崎牛嘅餐廳。人生都係第一次食啲咁靚嘅牛肉，就算你話我大鄉里都係咁話。當然食高級牛嘅話除咗牛肉味濃之外，最重要嘅就係有少少咬口得嚟又會入口即溶。而最後嘅甜品竟然係用返嗰塊吸咗牛肉汁嘅麵包做成嘅多士。在加上好特別嘅柿子醬同雪糕，真係冇得彈！不過最大鑊嘅係一直唔肯食肉嘅郭大少竟然對宮崎牛非常有興趣。
Also published on Medium.
